ಪ್ರೇಮಿಗಳ ದಿನ

    ಅರಿತು ಬೆರೆತ ಮನಗಳಿಗೆ ದಿನಾಲೂ ಪ್ರೇಮಿಗಳ ದಿನ

    ನಿಷ್ಕಲ್ಮಶ ಪ್ರೀತಿಗೆ ಯಾವುದಾದರೇನು ದಿನ?

    ವರ್ಷಕ್ಕೊಮ್ಮೆ ಪ್ರೇಮಿಗಳ ದಿನ, ಇಂದು ದಿನಕ್ಕೊಂದು ದುರಂತ ಪ್ರೇಮ ಕಥನ

    ಕೆಲವರಿಂದ ಆಗುತಿಹುದು 'ಪ್ರೀತಿಯ' ಬಹುದೊಡ್ಡ  ಪತನ

    ಪ್ರೇಮಿಗಳ ದಿನದಂದು ನಿವೇದಿಸಿಕೊಳ್ಳುವರು ತಮ್ಮ ಪ್ರೇಮವ

    ಆದರೆ, ಇಂದು ಹಲವರರಿಯರು ಒಲವಿನ ನಿಜವಾದ ಅರ್ಥವ  

    ಅದೆಷ್ಟೋ ಮಂದಿ ಆರಾಧಿಸುವರು ಕಣ್ಣಿಗೆ ಕಾಣುವ ಅಂದವ

    ಆದರೆ ಅರಿಯಲೆತ್ನಿಸರು ಪ್ರೇಮಿಯ ಅಂತರಂಗವ

    ಕೆಲವರು ತೋರಿಕೆಯ ಪ್ರೀತಿಗಷ್ಟೇ ಆಚರಿಸುತಿಹರು ಪ್ರೇಮಿಗಳ ದಿನ

    ಮೋಜು, ಮಸ್ತಿಯೊಡನೆ ಮಾಡುತಿಹರು ಟೊಳ್ಳು ಪ್ರೀತಿಯ ವೈಭವೀಕರಣ

    ಅಂತರಂಗದ ಅಂದವನರಿತವರು ಪ್ರೀತಿಸುವರು ಪ್ರತಿಕ್ಷಣ

    ಮನಸ್ಸು ಮನಸ್ಸುಗಳ ಮಿಲನಕೆ ಪ್ರತೀ ಗಳಿಗೆಯೂ ಶುಭ ಶಕುನ.

                                                                                             -ಅನುಪಮ ಬಿ ಜಿ  

ಇನಿಯನ ಜನುಮದಿನ

       ನನ್ನ  ಜೀವದ  ಜೀವವೇ , ಈ  ದಿನ  ನಿನಗೆ  ಜನುಮದಿನ
       ನಾ  ಏನನ್ನು  ತಾನೆ  ನೀಡಲಿ  ನಿನಗೆ ?  ನನ್ನ  ಹೃದಯದ  ಯಜಮಾನ
       ನೀನಿತ್ತ  ಪ್ರೀತಿಯ  ನನ್ನೊಳಗಿಟ್ಟು  ಸದಾ  ಮಾಡುವೆನು  ಜೋಪಾನ
       ಕಷ್ಟಗಳ  ನಾ  ನುಂಗಿ ,  ಅವೆಂದಿಗೂ  ನಿನ್ನೆಡೆಗೆ  ಸುಳಿಯದಂತೆ  ಹಾಕುವೆನು  ಕಡಿವಾಣ

       ನನ್ನ  ಮನದಾಳದ  ಹಾರೈಕೆಯೇ  ನಿನಗೆ  ನನ್ನ  ಉಡುಗೊರೆ
       ಎಂದಿಗೂ  ಬೇಯದಿರು  ನೀ  ಕಷ್ಟಗಳ  ಕೆಂಡದಲಿ  ನನ್ನ  ದೊರೆ
       ಸದಾ  ನಿನ್ನ  ಉನ್ನತಿಗಾಗಿಯೇ  ನಾ  ಹೋಗುವೆ  ಆ  ದೇವರ  ಮೊರೆ
       ಬೇಡುವೆನು  ನಾನು ,  ಸದಾ  ನಿನ್ನ  ಜೀವನದೊಳು  ಹರಿಯುತಿರಲೆಂದು  ಕ್ಷೀರ  ಧಾರೆ

       ಯಾವಾಗಲೂ  ಬಾಳಾಗಿರಲಿ ,   ನಿನಗೆ  ನೆಮ್ಮದಿಯ ತಾಣ
       ಯಶಸ್ಸಿನ  ಹಾದಿಯೆಡೆಗೆ  ಸಾಗುತಿರಲಿ  ಈ  ನಿನ್ನ  ಪಯಣ
       ಶೋಧನೆ , ವೇದನೆಗಳು  ಎಂದಿಗೂ  ಬಂದೆರಗದಿರಲಿ   ನಿನಗೆ  ನನ್ನೊಲುಮೆಯ  ಜಾಣ
       ನಿನ್ನ  ಹುಟ್ಟುಹಬ್ಬಕ್ಕೆ  ಬಳುವಳಿ  ಇಗೋ ,  ಈ ನನ್ನ ಪುಟ್ಟ ಕವನ !
                                                                                                 -ಅನುಪಮ ಬಿ ಜಿ  

ಕಾಣುವ ದೇವರು

    ದಿನಾಲೂ  ಮನೆಯ  ಶುಚಿಗೊಳಿಸಿ  ದೀಪವ  ಹಚ್ಚುವರು
    ತನ್ನ  ಮನಸ್ಸಿನಾಳದೊಳುದುಗಿರುವ  ಕೊಳೆಯ  ಬಗ್ಗೆ  ಅವರರಿಯರು
    ಎಲ್ಲೋ  ದೂರದ  ದೇವಸ್ಥಾನಗಳಿಗೆ  ಬಹಳ  ಶ್ರಮಪಟ್ಟು  ಹೋಗುವರು
    ಕಣ್ಮುಂದೆಯೇ  ಇರುವ  ಜೀವಂತ  ದೇವರುಗಳಿಗೆ  ಕೈ  ಜೋಡಿಸಿ  ಮುಗಿಯರು

    ತ್ಯಾಗಮೂರ್ತಿಗಳಾದ   ಹೆತ್ತವರಿಗೆ  ಮೊದಲು ನೀವು  ನಮಿಸಿ
    ಹಲವರು  ಅಗೌರವ  ತೋರುತಿಹರು  ಮಾತಾ-ಪಿತರಿಗೆ ,   ವೃದ್ಧಾಶ್ರಮಕ್ಕೆ  ಸೇರಿಸಿ
    ಪೋಷಕರು  ಮಕ್ಕಳನ್ನು  ಸಲಹುವರು  ಕಣ್ಣಿನ  ರೆಪ್ಪೆಯಂತೆ  ಪೋಷಿಸಿ
    ಅವರನ್ನು  ಕಡೆಗಣಿಸಿ ,  ಮಕ್ಕಳಿಂದು  ಹೊರಟರು  ತಮ್ಮದೇ  ಹಾದಿ  ಅರಸಿ

    ಮಕ್ಕಳೆಂದಿಗೂ  ಹೊರೆಯೆನಿಸಲಿಲ್ಲ  ಜನ್ಮ  ಕೊಟ್ಟ  ಆ  ದೈವಗಳಿಗೆ
    ಮಕ್ಕಳಿಗೀಗ  ಸಮಯವಿಲ್ಲ  ಅರೆಗಳಿಗೆ  ಪ್ರೀತಿ  ಹಂಚಲು  ಜನುಮದಾತರಿಗೆ
    ಅದೆಷ್ಟೋ  ಕಾಲ  ಮೀಸಲಿಡುವಿರಿ  ದೇವರ   ಹೋಮ ಹವನಗಳಿಗೆ
    ಕೊಂಚ  ಸಮಯ  ನೀಡಿರಿ  ಕಣ್ಮುಂದಿನ  ದೇವರುಗಳಿಗೆ ,   ಅದೇ  ಮನೋಲ್ಲಾಸ  ಆ  ಸವೆದ  ಜೀವಿಗಳಿಗೆ.
                                                                                                                               
                                                                                                     -  ಅನುಪಮ .ಬಿ .ಜಿ ಪ್ರಸಾದ್

ಸಾಧನೆಯ ಹಾದಿ

    ಸಾಧನೆಯ  ಹಾದಿ  ಬಹಳ  ಸುಲಭದ್ದಲ್ಲ
    ಅದರ  ತುದಿಯನ್ನು  ಮುಟ್ಟಲು  ಆಲಸಿಗಳಿಂದ  ಎಂದಿಗೂ  ಸಾಧ್ಯವಿಲ್ಲ
    ಯಾವುದೇ  ಸಾಧನೆ  ಒಂದೇ  ದಿನದಲ್ಲಿ  ಆದದ್ದಲ್ಲ
    ಅದಕ್ಕಾಗಿ  ಶ್ರಮಿಸಿರುವರು  ಸಾಧಕರು ,  ಅದೆಷ್ಟೋ  ದಿನಗಳು ,  ವರುಷಗಳೆಲ್ಲ

    ಸಾಧಿಸಬೇಕೆಂಬವನಿಗೆ ,  ಹಗಲು-ಇರುಳುಗಳ  ವ್ಯತ್ಯಾಸವಿಲ್ಲ
    ಕಲ್ಲು ,   ಮುಳ್ಳುಗಳ  ಹಾದಿಯ  ಬಗೆಗೆ  ಅಂಜಿಕೆಯಿಲ್ಲ
    ಯಾವುದೇ  ಸ್ಥಾನ  ಸುಲಭದಲ್ಲಿ  ದಕ್ಕುವುದಿಲ್ಲ                                                                                   
    ಅದಕ್ಕಾಗಿ  ಹಾಕು ,   ನಿನ್ನ  ಪ್ರಾಮಾಣಿಕತೆಯ  ಪರಿಶ್ರಮವನ್ನೆಲ್ಲ

    ಸಾಧನೆಯ  ಮಜಲುಗಳು  ಬಹಳ  ಕಡಿದಾದವು
    ಅದನ್ನೇರುವಾಗ ,  ಮಜಲುಗಳೆಡೆಗಿರಲಿ  ನಿಮ್ಮ  ಸಂಪೂರ್ಣ ಗಮನವು
    ನಿನ್ನಲ್ಲಿರಲಿ ,  ಅದೆಂತಹದೇ  ಬಿರುಗಾಳಿಗೂ  ಬೆಚ್ಚದೆ  ಮುನ್ನುಗ್ಗುವ  ಸ್ಥೈರ್ಯವು
    ಸದಾ  ನಂಬು ,  ನೋವಿನ  ಸರಪಳಿಗಳೇ  ಮುಂದೊಮ್ಮೆ  ನಿನಗೆ  ಗೆಲುವಿನ  ಹಾರವು.
                                                                                                                   
                                                                                                              - ಅನುಪಮ ಬಿ ಜಿ